വള്ളിക്ക് പടർന്നു കയറാൻ മരത്തിന്റെ താങ്ങുവേണം
അല്ല ഇവരുടെ സമരം തീർന്നില്ലേ ?
ആരുടെ?'
വക്കീലൻമാരുടെയും, മാദ്ധ്യമങ്ങളുടേയും?'
അത് സമരമല്ലല്ലോ, ഒരു തരം വാശിയല്ലേ .?
എന്തിനു വേണ്ടി ?
ആർക്കറിയാം ?, ഈഗോ വന്ന് തലക്ക് പിടിച്ചാൽ പിന്നെ കാരണങ്ങൾക്കാണോ പഞ്ഞം ? ആര് വലിയവർ , ഇത് തങ്ങളുടെ സാമ്രാജ്യം എന്നൊക്കെ ചിന്തിച്ചു പോയാൽ പിന്നെ കാരണങ്ങൾക്ക് അധികമൊന്നും അലയേണ്ട.
രണ്ടുകൂട്ടരും ന്യായീകരിക്കത്തക്ക വിധത്തിൽ കാരണങ്ങൾ നിരത്തുന്നു .
മാധ്യമപ്രവർത്തനം അതൊരു തുറന്ന വേദിയാണ് . ആ അവകാശങ്ങൾ നിഷേധിക്കുന്നത് ജനങ്ങളുടെ അറിയാനുള്ള അവകാശങ്ങളെ ഹനിക്കലാണ്.
പത്ര സ്വാതന്ത്ര്യം നിഷേധിക്കുന്നത് സ്വാതന്ത്ര്യത്തിനു നേരെയുള്ള കടന്നുകയറ്റം തന്നെ .
ഇത് കോടതി വിചാരിച്ചാൽ തീർപ്പു കൽപ്പിക്കാൻ പറ്റില്ലേ ?
പിന്നെന്താ ?
എല്ലാവരും മധ്യസ്ഥശ്രമങ്ങളുടെ വക്താക്കളായിട്ട് പ്രവർത്തിക്കുന്നുണ്ട്. പക്ഷേ ..അതുകൊണ്ട് വലിയ ഗുണമൊന്നും കാണാനില്ല .
ചില തീരുമാനങ്ങൾ കർശനമായിട്ടു എടുക്കുകയും നടപ്പാക്കുകയും വേണം. അതിനുള്ള ആർജ്ജവവും, ധൈര്യവും ഉണ്ടെങ്കിലേ നിയന്ത്രണവിധേയമാകൂ .
എന്നാൽ അതിനു കഴിവുള്ളവരാണ് വിരളം ഓരോ വിപ്ലവങ്ങളും ഇങ്ങനെയുള്ള ചെറിയ ചെറിയ അസംതൃപ്തികളിൽ നിന്ന് ഉടലെടുക്കുന്നതാണ് .
ഇതിനെയൊന്നും വിപ്ലവങ്ങൾ എന്ന് പറഞ്ഞു വിപ്ലവങ്ങളെ അവഹേളിക്കല്ലേ, ഇതെല്ലാം തോന്നിവാസങ്ങൾ മാത്രം .
ഒരു നാണയത്തിന്റെ ഇരുവശങ്ങൾ അത് നാണയം തന്നെയായിരുന്നാലേ അതിനു മൂല്യമുള്ളൂ , പരസ്പരം വേർപെട്ടു കഴിഞ്ഞാൽ പിന്നെ ആ നാണയത്തിന്റെ സ്ഥാനം ചവറ്റുകുട്ടയിൽ ആണ് .
ചിന്തിക്കേണ്ടവർ ചിന്തിച്ചാൽ നല്ലത് .
ഏതു കൂട്ടത്തിലും ചില വിഷമുള്ളുകൾ ഉണ്ടാകും, അതാണ് മറ്റുള്ളവരെ കുത്തുന്നത് . അതവിടെ തന്നെയിരുന്നാൽ ആ ഭാഗം പഴുത്ത് വൃണമായി മാറി ദുർഗന്ധം വമിക്കും , അതിനുള്ള പരിഹാരം ആ മുള്ളുകൾ എടുത്തു കളയുക എന്നുള്ളത് തന്നെയാണ് .
എല്ലായിടത്തും വേർതിരിവുകൾ, തങ്ങളുടേത് മാത്രമാണ് എല്ലാം എന്ന് വിശ്വസിക്കുന്നിടത്താണ് കുഴപ്പം . തൊട്ടതിനും പിടിച്ചതിനും വൈരുദ്ധ്യങ്ങൾ കാണുന്ന ഈ ലോകത്തിൽ ഇതിന്റെയെല്ലാം വേരറുത്തു മാറ്റി എല്ലാവരും തുല്യരാണ് എന്നുള്ള ബോധമാണ് നിറക്കേണ്ടത് .
ഈ ലോകം എല്ലാവരുടേതുമാണ്, ഇവിടെയുള്ള ഏവരുടേയും അവകാശങ്ങളും സ്വാതന്ത്ര്യങ്ങളും സംരക്ഷിക്കപ്പെടേണ്ടതുണ്ട് . പശുവിനെ കൊന്നാൽ കൊന്നവനെ തട്ടുന്ന നാട്ടിൽ ഇതൊന്നും അത്ര പ്രായോഗികമല്ല എങ്കിലും .. തിരുത്താനും .., മാറ്റാനും .., മാറ്റപ്പെടാനും കഴിയാത്തതായി യാതൊന്നുമില്ല എന്നുള്ളതാവണം ചിന്ത .
അതിനുള്ള നല്ല സംസ്കാരങ്ങൾ ചെറുപ്പത്തിലേ വളർത്തിയെടുക്കണം . അതിനു വേണ്ടുന്ന നല്ല വിദ്യാഭ്യാസവും , ശിക്ഷണങ്ങളും പുതിയ തലമുറകൾക്കെങ്കിലും ഗുണകരമാകുന്ന വിധത്തിൽ ഒരു പൊളിച്ചെഴുത്ത് അനിവാര്യം .
ലോകം ഇപ്പോഴേ വളരെ മോശമായിരിക്കുന്നു , എല്ലാവരും തന്നിലേക്ക് തന്നെ ചുരുങ്ങിയിരിക്കുന്നു . ഏതിനും എന്തിനും താൻ അല്ലെങ്കിൽ തങ്ങൾ എന്ന മനോഭാവം മാത്രം , അടുത്തവനെ ശത്രുവായി മാത്രം കാണുന്ന കണ്ണുകൾ എല്ലാം ഒരു ജനതയുടെ നാശത്തിലേക്കുള്ള ചവിട്ടു പടികൾ തന്നെയാണ് .
ഒരു തലമുറ ചെളിയിലാണ്ടു പോയിരിക്കുന്നു , ഇനി വരുന്ന തലമുറകളെങ്കിലും സാഹോദര്യത്തിന്റെ വഴിയിലൂടെ ചരിക്കേണ്ടത് ലോക നന്മക്ക് തന്നെ അത്യന്താപേക്ഷിതമാണ് .
ഇല്ലെങ്കിൽ ഇനിയും കലാപക്കൊടികൾ ഉയർന്നു കൊണ്ടേയിരിക്കും അതൊരു യുഗത്തിന്റെ തന്നെ അന്ത്യമായിരിക്കും . പരസ്പരം ആക്രോശിച്ചും, വെട്ടിയും, കൊന്നും ,കൊലവിളിച്ചും തീരുന്ന മനുഷ്യായുഗത്തിന്റെ അന്ത്യം .
0 അഭിപ്രായങ്ങള്