ഒരു ഡ്രൈ.. ഡേ
ഡാ .., ഉവ്വേ ഇന്ന് ഡ്രൈ ഡേ ആണല്ലേ ?
അതെന്താ ഈ ഡ്രൈ ഡേ.?, മഴയില്ലെങ്കിലും ഇപ്പെന്താ പ്രശ്നം .?
മഴക്കല്ലാ ഡ്രൈ ഡേന്ന് പറയണത് മറ്റവൻ കിട്ടാത്ത ദിവസത്തിനാണ്.
ഓ .., അപ്പൊ ഒന്നാന്തീകളും മറ്റവൻ കിട്ടത്തില്ലല്ലോ ?
അത് .., വേറേ നമ്മടെ ഗവണ്‍മെന്റ് ഘട്ടം , ഘട്ടായിട്ട് ആൾക്കാരെ നന്നാക്കാനുള്ള പരിപാടീടെ ഭാഗാണ് ,ഈ സിസ്റ്റത്രെ.
ഫസ്റ്റ് .., ഒന്നാന്തീ പിന്നെ സണ്‍‌ഡേകള് , അത് കഴിഞ്ഞ് വിശേഷ ദിവസങ്ങള് .
അതായത് .., ഓണം , ക്രിസ്തുമസ്സ് , ഈസ്റ്റർ അങ്ങിനെ നിറുത്തി നിറുത്തി ആഴ്ച്ചേല് ഒരു ദിവസം മാത്രം മദ്യം കൊടുക്കും . അന്ന് കേരളത്തിന് മൊത്തം പൊതു അവധീം പ്രഖ്യാപിക്കും കാരണം എല്ലാവർക്കും ഈ സാധനം വാങ്ങി ഒരാഴ്ച്ചത്തേക്ക് സ്റ്റോക്ക് വെക്കേണ്ടേ .?
അല്ല .., ഈ ഗവണ്‍മെന്റ് ജീവനക്കാർക്കൊക്കെ ഒന്നാന്തീ ആണോ ശമ്പളം കിട്ടുന്നത് ?, സാധാരണ 28- ആം തീയ്യതി ഒക്കെ കിട്ടത്തില്ലയോ ? അല്ല എനിക്കറിയാൻ മേലാഞ്ഞിട്ട് ചോദിക്കുവാണേ .?
പിന്നെ ഒരുമാതിരിപ്പെട്ട സ്ഥാപനങ്ങളൊക്കെ 28, 29., തീയ്യതികളിലൊക്കെയായി ശമ്പളം കൊടുക്കാറുണ്ട് . ഇനീപ്പോ ചെറുകിട കമ്പനികളൊക്കെ ആണെങ്കീ ഒന്നാന്തീ, ഒരിക്കലും ശമ്പളം കൊടുക്കാറൂല്ല്യാ അവരുടെ ശമ്പള ദിവസമെല്ലാം അഞ്ചാം തീയ്യതിക്ക് മേലെയായിരിക്കും .
ദിവസക്കൂലിക്കാരാണെങ്കിൽ വൈകുന്നേരത്തോട് കൂടി അവരുടെ കൂലിയും കിട്ടുന്നു .
അപ്പോ .., ഈ ഒന്നാം തീതി മദ്യം വിൽക്കാൻ പാടില്ലാന്ന് പറേണേന്റെ ലോജിക്കെന്താ എന്റെ ചങ്ങായീ ?
ആ ..., ഞമ്മക്ക് കൈ മലർത്താനെ പറ്റത്തുള്ളൂ
സംഗതി, ആ പോയിന്റ് ഞാനിപ്പളാ ആലോചിച്ച് നോക്കീത് പിന്നെ മാസത്തിലെ ആദ്യ ദിനം എന്നതിൽ കവിഞ്ഞ് എനിക്ക് ഒന്നാന്തിയോട് പ്രത്യേകിച്ച് ഒരു മമതയുമില്ല . പിന്നെ ചുഴിഞ്ഞ് നോക്ക്യാ കുറച്ചൊരു ഇഷ്ട്ടക്കേട്‌ ഉണ്ടുതാനും .
കാരണം .., ഇരുപത്തിയെട്ടാം തീയ്യതിയോടുകൂടി ശമ്പളം കൈയ്യില് വരും പിന്നെ അടുത്ത ശമ്പളത്തിനുള്ള ദിവസങ്ങൾ എണ്ണിത്തുടങ്ങലായി അതിലെ ആദ്യത്തെ നമ്പറ്കാരനല്ലേ ഓൻ അതുകൊണ്ട് എനിക്ക് അത്ര വല്യ ഇഷ്ട്ടൊന്നും ഇപ്പറയണ ഒന്നാം കാരനോടില്ല .
അല്ലെങ്കിലും നമുക്കാ ചാർത്തിക്കിട്ടിയ പേരു മാത്രല്ലേ ഉള്ളൂ ...
അഭ്യസ്ഥവിദ്യരുടെ നാടെന്ന് ? സത്യത്തില് നമുക്കാ നെറ്റിപട്ടംച്ചുമക്കാനുള്ള വല്ല യോഗ്യതയുണ്ടോ ? വെറുതങ്ങട് പഠിച്ചു കൂട്ടീട്ട് ഒരു കാര്യൂല്ലാന്ന് പ്രാക്റ്റിക്കലായിട്ട് എന്തെങ്കിലും ചിന്തിക്കാനുള്ള ബോധം വേണം .
സംഗതി അതില് കുറച്ച് കഴമ്പുണ്ടിട്ടാ
അതേപോലെ സണ്‍‌ഡേ കിട്ടില്ലാത്രേ, എന്തൊരു ഗതികേടാണപ്പാ മനുഷ്യൻ ആറ് ദിവസം ജോലി ചെയ്തീട്ട് സണ്‍‌ഡേ, ഫാമലീടൊപ്പം ഒന്ന് ജോളിയായിട്ട് ഇരിക്കുമ്പോ ഒരു രണ്ടെണ്ണം വീശീല്ലെങ്കി , അതിലെന്താണെടോ ഒരു രസം .?
ഇതിപ്പോ ശനിയാഴ്ച ജോലി കഴിഞ്ഞ് വന്നിട്ട് പോയി ക്യു നിൽക്കണം ഞായറാഴ്ച്ച , അടിക്കാനായിട്ട് . അത് പെട്ടെന്ന് കിട്ടോ? ഒടുക്കത്തെ ക്യു അല്ലേ ഏതാണ്ട് പുതിയ പടം റിലീസാവണ തിരക്കല്ലേ ?
അപ്പൊ ശനിയാഴ്ച കുറച്ച് നേരത്തേ എറങ്ങാൻ നോക്കും സംഗതി , പെർമിഷൻ ചോദിക്കുമ്പോ തന്നെ നമ്മടെ ബോസ്സിന് കാര്യം മനസ്സിലാവും പിന്നെ പുള്ളിക്ക് വന്ന് ക്യു നിക്കണ്ടല്ലോ ?
ആ ..,ഒറ്റ കാര്യത്തില് നമുക്ക് എല്ലാ ശനിയാഴ്ച്ചയും പെർമിഷൻ ..ഒക്കെ..
ഈ .., ശനിയാഴ്ച്ച വാങ്ങി വീട്ട്യെ വെച്ചാല് വേറൊരു ദോഷണ്ട്
ചക്കരക്കുടം കിട്ട്യാല് ആരെങ്കിലും കൈയ്യിട്ട് നക്കാണ്ടിരിക്കോ ?
അപ്പൊ എന്താവും .?
എന്താവാൻ ?, ശനിയാഴ്ച്ച രാത്രി തൊട്ടെന്നെ അടി തൊടങ്ങും
ഇതിപ്പോ ഞായറാഴ്ച്ച മാത്രം രണ്ടെണ്ണം വീശണ , എന്നേപ്പോലുള്ള ധാരാളം പേരെ ബാധിക്കണ പ്രശ്നാണേ.
ഞായറാഴ്ച്ച , ഒരു പതിനൊന്ന് മണിക്ക് നല്ല പോത്തെറച്ചി ഇങ്ങട് അടപ്പത്ത് കറി മസാലേല് കിടന്ന് .., ഗുളു ..ഗുളൂന്ന് വേവണ .., മണം ആസ്വദിച്ചീട്ട് ഒരു രണ്ടെണ്ണം .
ഒരു പ്രീ ആപ്പിറ്റൈസറേ
അപ്പൊ വിശപ്പങ്ങട് തള്ള്യാ വരും ...,വാടാ പോത്തേ .., നമുക്കൊരു കൈ നോക്കാടാന്നും പറഞ്ഞ് . എന്നിട്ടാ പാടത്തും , പറമ്പിലും , പിള്ളേര്യേം കൊണ്ട് ഒരു വാക്കൌട്ട്, ഒരാഴ്ചത്തെ മുഴുവൻ കാര്യങ്ങളും അവർക്ക് പറയാനുണ്ടാവേ .
വെച്ച ചെടികളൊക്കെ നന്നായി വളർന്നോ.?, പൂവ് പൂത്തോ ?, മാവ് കായ്ച്ചോ ?നെല്ല് കൊയ്തോ .?, കിളി വന്നോ ? അടക്കാ പക്ഷി കരഞ്ഞോ?, കഴിഞ്ഞാഴ്ച്ച കണ്ട പാടത്തത്ത ഈയ്യാഴ്ച്ച വീണ്ടും വന്നോ ?
ഇതൊക്കെ അന്വേഷിക്കണ ഒരു നടത്തം പിള്ളേരാണെങ്ക്യെ , നമ്മടെ വാലേ തൂങ്ങി .
എല്ലാ കാര്യങ്ങളും അവര് നമുക്ക് നല്ല വള്ളി പുള്ളി വിടാണ്ട് വിശദീകരിച്ചു തരും .
അപ്പാ .., ദേ .., കഴിഞ്ഞാഴ്ച്ച വന്ന നമ്മടെ ആ കിളീല്ല്യേ അതിനെ കാണാല്ല്യാട്ടാ . പിന്നെ നമ്മടെ ആ ചെന്തെങ്ങ്മ്മേ കണ്ട കിളിക്കൂടില്ലേ.?, അതില് കിളി മുട്ടേ ട്ടു ....അപ്പാ ...
മൂത്തോൻ .., പറഞ്ഞുകൊണ്ടിരിക്കുമ്പോ താഴേള്ളോനും വാശി കേറും അവൻ മാത്രം ഇങ്ങനെ ചറപറാ സംസാരിച്ച് കൊണ്ടിരിക്കല്ലേ ?, ഇതൊക്കെ കേക്കുമ്പോ അവനും മൂച്ച് കേറും .
സംഗതി ഒന്നും പറയാൻ അറിയില്ലെങ്കിലും എന്തേങ്കിലും പറയണല്ലോ.?
അപ്പാ .., മ്മടെ കൊളത്തില് ഞാൻ കുളിക്കാൻ ഇറങ്യപ്പോ ആ മീൻ എന്നെ കടിക്കാൻ വന്നപ്പാ പക്ഷേ .., ഞാനോടി ... നമുക്ക് അവനെ തല്ലണപ്പാ...
നീ പേടിക്കേണ്ടടാ... , നമുക്ക് അവനെ പിടിച്ച് നല്ല ഇരുമ്പൻ പുളിയും തേങ്ങാപ്പാലും ചേർത്ത് കൂട്ടാൻ വെക്കാം .
പിന്നെ .., മാവിന്റെ മറെല് വെച്ച് മക്കള് കാണാണ്ട് ഭാര്യക്കൊരെണ്ണം.
''യേത് ''?
''ഒരു സ്മോളേ .
ഇതെല്ലാം കഴിഞ്ഞ് കുളത്തിലൊന്ന് വിശാലമായി നീന്തിക്കുളിച്ച് വീട്ടിലോട്ട് കേറി ചെല്ലുമ്പോഴേക്കും ബീഫെല്ലാം നന്നായി വെന്ത് ചാറെല്ലാം കുറുകി നല്ല കുമു കുമാ മണത്തോടെ റെഡി ആയിട്ടിണ്ടാവും.
അതും .., നല്ല ആറ്റുമീൻ കുടംമ്പുളിയിട്ടു വറ്റിച്ചതും പിന്നെ , നാടൻ കപ്പ പച്ചമുളക് അരച്ചു ചേർത്തതും കൂട്ടി ഒരു പിടി പിടിച്ചാ പിന്നെ വയറ് രണ്ടെണ്ണം ആയിട്ടേ നിറുത്തുള്ളൂ .
അത് കഴിഞ്ഞ് വിശാലായൊരു ശയനം .
ഇതൊക്കെല്ല്യെടോ നമ്മടെ ഒരു സണ്‍‌ഡേ സന്തോഷം ?, എന്നാ ഇതിപ്പോ ശനിയാഴ്ച്ച തന്നെ ഇനി ഒരു ദിവസം കൂടി ലീവല്ലേ എന്ന് കരുതി അങ്ങട് വീശി തൊടങ്ങും പിന്നെ ഈ സാധനം ശനിയാഴ്ച്ച തന്നെ വാങ്ങി വെക്കാണല്ലോ .?
എന്നിട്ടെന്താ .., ഞായറാഴ്ച്ച ഒരു മൂഡും ഉണ്ടാവില്ല ഹാങ്ങ്‌ ഓവർ , തലവേദന അങ്ങിനെ എല്ലായി ആ ദിവസങ്ങട് വെറുതേ പൂവും .
ഒന്നൂല്ലെങ്കെ ഇതങ്ങ്ട് നിർത്താ .., ഒരു ദിവസം പോലും വേണ്ടാന്ന് .
നമ്മളും കൂടി തിരഞ്ഞെടുത്തോര് അവരുടെ ഇഷ്ട്ടത്തിനാ ഇനി നമ്മള് കുടിക്കാൻ പാടുള്ളൂന്ന് പറഞ്ഞാല് .?
ഇനീപ്പോ നമ്മടെ വോട്ടൊന്നും വേണ്ടാത്രേ കുടിക്കണോരുടെ വോട്ടൊന്നും വേണ്ടാന്നാ പറയണെ .
ഈ .., കുടിക്കണോര്ന്ന് പറയുമ്പോ വല്ലപ്പോഴും കുടിക്കണോരും പെടൂല്ല്യെ .?
പിന്നെന്താ .., സംശയം?, കുടിക്കണോര്ന്ന് പറയുമ്പോ അതില് എല്ലാവരും പെടുന്നേ അതില് ദിവസക്കണക്കും , മാസക്കണക്കും ഒന്നൂല്ല്യാന്നെ .
അപ്പൊ പ്പിന്നെ ഇലക്ഷൻ ഇല്ലാണ്ടെന്നെ ഒരു പാർട്ടിക്ക് ജയിക്കാലോ ?
വിനാശകാലേ.., വിപരീത ബുദ്ധി .
നമ്മടെ ആൾക്കാർക്കൊക്കെ ഒരു വല്യേ നിനപ്പുണ്ട് അതായത് നമ്മളൊക്കെ ഭയങ്കര ബുദ്ധിക്കാരും മറ്റുള്ളവരൊക്കെ വെറും കിഴങ്ങൻമാരാണെന്നും
മറ്റുള്ളവരുടെ ബുദ്ധിയോ, കഴിവുകളോ, നമ്മളൊട്ട് അംഗീകരിച്ചു കൊടുക്കാറുമില്ല .
അതെന്താന്ന് ചോദിച്ചാ അത് മലയാളീടെ മാത്രം ഒരു പ്രത്യേകതയാ.
തിന്നൂല്ലാ ..., തീറ്റിക്കൂല്ല്യാ .
അല്ലെങ്കി ലോകത്ത് എവിടെയെങ്കിലും ഇത്തരമൊരു നാട്ടു നടപ്പ് കേട്ടു കേൾവി പോലുമുണ്ടോ .?
ഒന്നാന്തീം , ഞായറാഴ്ച്ചകളും മദ്യം കൊടുക്കകേലാന്ന്
ഇതിനൊക്ക്യാ ഈ ബല്യേ .., ബല്യേ.., ആൾക്കാര് പറേണത്..
ഏത് കാര്യത്തിനും ഒരു ലോജിക്ക് വെണന്ന് .,
യേത് ...?
ലോജിക്കേ ....!
0 അഭിപ്രായങ്ങള്‍