ഒരു ചമ്മന്തിപ്പുരാണം
ഇന്നും ചമ്മന്തിന്ന്യാവോ ?
ആവും .
ഛെയ് ആവില്ല
ആകാംഷേല് ഞാനാകെ വീർപ്പുമുട്ടി നിക്കാ . കാരണം ഉച്ചക്കിലത്തെ എന്റെ ചോറിലെ അവിഭാജ്യഘടകമാണ് ചമ്മന്തികള് .
പലതരം ചമ്മന്തികളാ മുളക് ചമ്മന്തി, തേങ്ങാ ചമ്മന്തി , പുളിചമ്മന്തി , കാന്താരി മുളക് ചമ്മന്തി അങ്ങിനെ .., അങ്ങിനെ വിവിധതരം ചമ്മന്തികളുടെ ഒരു ഘോഷയാത്ര. എന്റെ അമ്മക്ക് വേറെ കറികളൊന്നും ഉണ്ടാക്കാനൊന്നും അറിയാഞ്ഞിട്ടല്ല പക്ഷേ ..., അതിനുള്ള വകുപ്പ് വേണ്ടേ ?, ചമ്മന്തിക്ക് അധികം പൈസചിലവില്ലല്ലോ.
എനിക്കാണെങ്കീ ഈ ചമ്മന്തികൾ കാണുന്നത് തന്നെ കലിപ്പാ പക്ഷേ .., ഈ കലിപ്പ് കൊണ്ട് അമ്മയോട് തീർത്താല് ആ പാവത്തിന് എന്ത് ചെയ്യാൻ പറ്റും ?
എന്നും ഉച്ചക്ക് എല്ലാവരുടേയും ചോറുപാത്രം തുറക്കുമ്പോൾ നല്ല മീൻ കറിയുടെയും , മീൻ വറുത്തതിന്റേയും , സാമ്പാറിന്റേയുമെല്ലാം കൊതിയൂറുന്ന കാഴ്ച്ചകൾ . നമ്മടെ ചോറുപാത്രം തുറക്കുമ്പോൾ മാത്രം ചോറിനോട് ഒട്ടിപ്പിടിച്ചിരിക്കുന്ന ഒരു സ്പൂണ് ചമ്മന്തി, അതങ്ങനെ ആ മൂടിയോട് ചേർന്നിരിക്കുന്നുണ്ടായിരിക്കും .
അതുകൊണ്ട് ഞാനെപ്പോഴും ഒറ്റക്കിരുന്നായിരിക്കും ഊണ് കഴിക്കാറ് നമ്മുടെ ദാരിദ്രം മറ്റുള്ളവരെ കാണിക്കേണ്ടല്ലോ.?
കൂട്ടുകാരെല്ലാവരും വട്ടം കൂടിയിരുന്ന് സന്തോഷത്തോടെ കറികൾ പങ്കു വെച്ചു കഴിക്കുമ്പോൾ ഞാൻ മാത്രം ഏകനായി കാരണം എന്റെ കൈയ്യിൽ പങ്കു വെക്കാനായി എന്നും ചമ്മന്തി മാത്രമേ ഉണ്ടാകാറുള്ളൂ .
ഇന്നലെ ഗതി കെട്ടാണ് അമ്മയോട് വഴക്കുണ്ടാക്കിയത് .
കടം വാങ്ങിയാണെങ്കിലും നാളെ നിനക്ക് അമ്മ എന്തെങ്കിലും കൂട്ടാനുണ്ടാക്കിത്തരാടാ .
അമ്മ അത്രയും വാക്ക് പറഞ്ഞതല്ലേ , അപ്പോ ഇന്ന് എന്തെങ്കിലും കൂട്ടാനുണ്ടാവും .
എന്താണാവോ.. ഇറച്ചി ?
അയ്യോ .. അത് അതിമോഹാവും
ഞായറാഴ്ച്ചേകളിൽ തന്നെ ഇറച്ചിക്കറി ഒരു ആഡംബരമാണ്
പിന്ന്യാണോ ഇന്ന്.?
വെള്ളിയാഴ്ച്ച ആകുമ്പോഴേ ഭയങ്കര സന്തോഷമാണ് ഞായറാഴ്ച്ച പോത്തിറച്ചി വാങ്ങൂല്ലോന്നോർത്ത് . ശനിയാഴ്ച്ച പെരുത്തു സന്തോഷം ഇനി ഒരു ദിവസം കൂടിയല്ലേ കാത്തിരിക്കേണ്ടാതുള്ളൂ എന്നോർത്ത് .
എന്നാൽ പല ഞായറാഴ്ച്ചകളിലും ഉച്ചയോടുകൂടി ആ സന്തോഷം ആവിയാവുകയാണ് പതിവ് .
സണ്ഡേ സ്കൂൾ കഴിഞ്ഞ് വരുമ്പോ എല്ലാ വീടുകളീന്നും , ചിക്കനും , മട്ടനും .., നല്ല മസാല ചേർത്ത് തിളക്കുന്ന മണം ഇങ്ങനെ മൂക്കിലേക്കങ്ങ് അടിച്ചു കേറുമ്പോ .
''ഹോ ..'' വായേല് കപ്പലോടിക്കാനുള്ള വെള്ളം നിറയും
പക്ഷേ...., ഊണിനു മുമ്പിൽ ഇരിക്കുമ്പോഴാവും പരിപ്പും പറമ്പിന്ന് പറിച്ച താളീം ചേർത്ത് ഒരു വെള്ളം പോലത്തെ കറി .
ദേഷ്യം .., സങ്കടം ഒക്കെ വരും ആരോട് പ്രകടിപ്പിക്കാൻ, പ്രകടിപ്പിച്ചിട്ട് എന്ത് കാര്യം ?,
വീട്ടില് അതിനുള്ള വക വേണ്ടേ ?
ചില ആഴ്ചകളില് ഇറച്ചി വാങ്ങാനുള്ള അത്രയും കാശ് ഉണ്ടാവില്ല അപ്പൊ
ഇറച്ചിക്കടലേ തിരക്ക് ഒഴിയുന്നത് വരെ കാത്തു നിൽക്കും . എന്നിട്ട് അതിന്റെ ഈ പൊങ്ങ്ന്ന് പറഞ്ഞ ഒരു ഭാഗം ഉണ്ട് അതിങ്ങനെ സ്പോഞ്ച് പോലെ ഇരിക്കും ലിവറിന്റെ അത്ര കട്ടിയും ഉണ്ടാകത്തില്ല .
സാധാരണ ആരും അത് വാങ്ങാറില്ല ഞങ്ങളെപ്പോലത്തെ ആൾക്കാരായിരിക്കും അതിനു വേണ്ടി ക്യു നിൽക്കുക വില കുറവും ഇറച്ചിയുടെ പേരും ..., എന്നാലും അത് ഒരു സന്തോഷം തന്നെയായിരുന്നു .
അപ്പൊ ഇന്ന് ഇറച്ചി ആവില്ല , അതുറപ്പ്.
അപ്പൊപ്പിന്നെ .., മുട്ട ? ചിലപ്പോ ആവാം .., കാരണം വീട്ടില് കോഴിനെ വളർത്തുന്നുണ്ട് . പക്ഷേ .., അതിന്റെ മുട്ട കൂട്ടാൻ വെക്കണ്ട കാര്യം കഷ്ട്ടമാണ് . കാരണം കോഴി ഞങ്ങടെ വീട്ടിലെ ഒരു അന്ന ദാതാവാണ് മുട്ട വിറ്റു കിട്ടുന്ന കാശു കൂടി കൂട്ടിയിട്ടാണ് റേഷൻ അരി വാങ്ങാറ് .
അതെന്നെ കോഴീടെ മൂട്ടില് വിരല് ഇട്ട് നോക്കി അഡ്വാൻസ് മുപ്പാടെ വാങ്ങിയിരിക്കും. കോഴിക്കന്ന്യേ അരോചകമാണ് സമാധാനമായിട്ട് ഒന്ന് മുട്ടയിടാനും പറ്റുന്നില്ലല്ലോ എന്നോർത്ത് .
ദരിദ്ര്യന്റെ വീട്ടില് .., ഇനി കോഴി ആയിട്ട് പോലും പിറക്കരുതെന്ന് പ്രതിജ്ഞയെടുത്തു കാണും .
പിന്നെ ..,പരിപ്പ് .?, ആവാം, ആവാതിരിക്കാം .
ആകാംഷ അടക്കാനാകുന്നില്ല , എന്ത് കറിയായിരിക്കും അമ്മ ഉണ്ടാക്കി വെച്ചിരിക്കുന്നത് .? ഇന്നെങ്കിലും കൂട്ടുകാരുടെ കണ്മുന്നിൽ വെച്ചു തന്നെ ചോറുപാത്രം തുറക്കണം .
ജിഞ്നാസ ഒരിടത്തും ഇരിപ്പുറക്കുന്നില്ല അങ്ങിനെ ഞാനാ അതിസാഹസം കാണിച്ചു ...
ഇന്റെർവെല്ലിന് മണിയടിച്ചതേ ഞാൻ ഡെസ്ക്കിൽ വെച്ച് ചോറു പാത്രം തുറന്നു നോക്കി . കൂട്ടാൻ തിരഞ്ഞ എന്റെ കണ്ണുകൾക്കു മുന്നിൽ അതാ ചമ്മന്തിയുടെ മറ്റൊരു രൂപം .
എന്നിൽ കോപം ഇരച്ചു കയറിയ അതേ നിമിഷത്തിൽ തന്നെയായിരുന്നു ആ അത്യാഹിതം നടന്നത് .
തുറന്നു വെച്ചിരിക്കുന്ന എന്റെ ചോറ്റു പാത്രത്തിനു മുകളിലേക്ക് മുന്നിലെ ബെഞ്ചിൽ നിന്നിരുന്ന എന്റെ ഒരു സുഹൃത്ത് ഒറ്റ ഇരുപ്പായിരുന്നു സത്യത്തിൽ .., അവനേയും കുറ്റം പറഞ്ഞിട്ടു കാര്യമില്ല.
ഇന്റർവെൽ സമയത്ത് ആരെങ്കിലും ചോറുപാത്രം തുറക്കുമോ ?
എന്റെ ചമ്മന്തി മുഴുവൻ അവന്റെ മൂട്ടിൽ ഒട്ടിപ്പിടിച്ചിരിക്കുന്നു.
ഞാനാകെ പരവേശനായിപ്പോയി .
എന്റെ ദൈവമേ ..., ഉച്ചക്ക് ചോറുണ്ണാനുള്ള ആകെയുള്ള മൊതലാണ് അവന്റെ മൂട്ടിൽ ഒട്ടിപ്പിടിച്ചിരിക്കുന്നത് .
കൂട്ടാനോടുള്ള എന്റെ ആശയെല്ലാം പറ പറന്നു എങ്ങിനെയെങ്കിലും ആ ചമ്മന്തിയെങ്കിലും തിരിച്ചു കിട്ടിയാൽ മതിയെന്നായി എനിക്ക് .
അതാണെങ്കിൽ അവന്റെ മൂട്ടിൽ ഒരു .., ഒരു രൂപാ കോയിൻ കണക്കെ അങ്ങിനെ വട്ടത്തിൽ ഒട്ടിപ്പിടിച്ചിരിക്കുന്നു .
ജസ്റ്റ് മിസ്സ്ന്ന് പറയണപോലെ..
അല്പം മാറി കീറിയ ട്രൌസറിന്റെ വിടവിലൂടെ അവന്റെ നഗ്നമായ കുണ്ടിയുടെ ഒരു ഭാഗം കാണാം .
കിറു കൃത്യമായി അവൻ ഇരുന്നത് അവന്റെ ഭാഗ്യം ഇല്ലെങ്കിൽ എന്റെ കാന്താരി മുളക് ചമ്മന്തി അവനെ സ്വർല്ലോഗം കാണിച്ചേനെ ?
ചമ്മന്തിയില്ലെങ്കിൽ എന്റെ ഉച്ചയൂണ് ?
ഒടുവിൽ ഞാനാ അതിസാഹസം കാണിച്ചു അവന്റെ മൂട്ടീന്ന് പതുക്കെ ഞാനാ ചമ്മന്തി വടിച്ചെടുത്തു .
എന്തോ , അന്നത്തെ ആ ചമ്മന്തിക്ക് ഒരു പ്രത്യേക രുചി ഉള്ളതു പോലെ എനിക്ക് തോന്നി . അതോട് കൂടി അമ്മയോടുള്ള , എന്റെ ചമ്മന്തി പരാതിയും തീർന്നു കിട്ടി .
0 അഭിപ്രായങ്ങള്